“Миллионлар ўйини” дея аталмиш футбол мухлислар учун ўйналиши бежиз эмас. Шунинг учун ишқибозларнинг қўллаб-қувватлаши футболчиларга ўзгача далда бўлади.  “Нефтчи” жамоаси ўзининг мухлислари билан фахрланиб келади. Фарғоналиклар мухлис тўплаш бўйича етакчи саналади. Ҳар доим мухлислар бевосита стадионга келиб, жамоани қўллаб-қуввалаб туришди.

Хусусан, Косонсойдаги ўйинда ҳам Фарғонадан минг нафарга яқин мухлисларнинг ташриф буюргани бизни қувонтирди. Мана шундай ашаддий мухлислар борлигидан мамнунмиз. Айтиш жоизки, “Нефтчи” ўз мухлисларини уялтириб қўймайди. Жамоа аъзолари сизларни “ўн иккинчи ўйинчи” сифатида билишади. Сизлар бор экан, “Нефтчи” яна илгариги шон-шуҳратини тиклайди. Жамоа ҳар сафар ишқибозларни хурсанд этиш учун майдонга тушади.  Клубнинг  ашаддий мухлислари сифатида узоқ масофаларни босиб ўтиб, ҳеч бир ўйинни ўтказиб юбормай бевосита стадионда томоша қилиб бораётган ишқибозлар сони ҳам жуда кўп. Тан олиш лозим, “Нефтчи”нинг мухлисларига Ўзбекистоннинг бошқа жамоалари ҳавас кўзи билан қарашади.

Маълумки, 26 август куни жамоамиз олий лига 17-тур доирасида Тошкентда “Бунёдкор”га қарши майдонга тушади. Ушбу учрашувнинг аҳамияти “Нефтчи” учун жуда баланд ва бунда жамоа ўз мухлисларининг далдасига муҳтож бўлади. Жамоанинг ашаддий мухлислари шу куни бевосита стадионда “Нефтчи”ни қўллаб-қувватлашлари эса ижобий натижа қайд этилиши учун замин яратган бўларди. Ўйлаймизки, “Нефтчи” мухлислари “ўн иккинчи ўйинчи” эканликларини исботлаб, Тошкентда ҳам жамоани бевостида стадионда қўллаб-қуватлашади.

“Нефтчи” ПФК матбуот хизмати