Кеча, 27 март куни “Бавария” ва Германия терма жамоаси афсонаси Мануэль Нойер 40 ёшни қарши олди. Шу муносабат билан Мюнхен клубининг собиқ устози Феликс Магат дарвозабоннинг жаҳон футболидаги ўрни ҳақида тўхталиб ўтди. Бу ҳақда Goal нашри хабар бермоқда.

Магатнинг фикрича, Нойер ўз позициясида футбол тарихидаги энг буюк шахслардан бири ҳисобланади:

“Унинг эришган ютуқлари ва жамоа учун аҳамиятини ҳисобга олсак, Мануэлни ўз позициясида Месси ва Криштиану Роналду билан бир қаторга қўйган бўлардим. Ўз вақтида "Бавария" у учун тўлаган маблағ шунчаки фойдали келишув эмас, балки ҳақиқий совға эди!”

Мураббийнинг таъкидлашича, агар Нойер бугунги трансфер бозорида ўзининг “пик” формасида бўлганида, унинг нархи 150 миллион евродан кам бўлмас эди. Шунингдек, Магат 40 ёшли дарвозабонга фаолиятини якунлашга шошилмасликни маслаҳат берди:

“Унга маслаҳатим: куч-қуввати бор экан, бутсасини михга илишга шошилмасин ва имкон қадар узоқ вақт давомида ўйнасин”.​

Маълумот учун, жорий мавсум Мануэль Нойер “Бавария” таркибида 29 та учрашувда майдонга тушиб, ўз дарвозасидан 27 та гол ўтказиб юборган. Яна 10 та баҳсда эса дарвозаси даҳлсизлигини сақлаб қолган.