Испания терма жамоаси ва «Реал Мадрид»нинг собиқ сардори Серхио Рамос «Севилья» клубини сотиб олиш бўйича ҳаракатларини давом эттирмоқда.
Marca нашрининг аниқлик киритишича, клубни сотиб олиш унга тахминан 450 миллион еврога тушади. Албатта, Рамос бу маблағни ўз ёнидан чиқармайди — гап лойиҳага қизиқиш билдирган ва уни «торта оладиган» инвесторларни топиш ҳақида кетмоқда.
Бу борада илгарилаш бор: Рамосга Five Eleven Capital жамғармаси ёрдам беришга тайёр. Ушбу жамғарма вакиллари сўнгги вақтларда клуб ўйинларида тез-тез кўриниш бермоқда. Тўғри, ҳозирча «Севилья» мақтанишга арзигулик натижа кўрсата олмаяпти — жамоа Испания чемпионати турнир жадвалида атиги 16-ўринда бормоқда.
