Испаниянинг «Реал Мадрид» клуби ва Франция терма жамоаси ярим ҳимоячиси Орельен Тчуамени фаолиятини «туманли Альбион»да давом эттириши мумкин. 26 ёшли таянч ярим ҳимоячисининг хизматларига Англия Премьер-лигасининг иккита топ-клуби қизиқиш билдирмоқда.
Манбанинг берган маълумотларига кўра, «Ливерпуль» ва «Манчестер Юнайтед» Тчуаменини ўз сафига қўшиб олишни истамоқда. Ҳар иккала клуб футболчига йилига 12 миллион евро миқдорида иш ҳақи таклиф қилишга тайёр.
Ўз навбатида, «Реал» ўз асосий футболчиси билан хайрлашиш ниятида эмас. Орельеннинг ўзи ҳам Мадридни тарк этишга иштиёқ билдирмаяпти.
Жорий мавсумда франциялик футболчи «қаймоқранглилар» сафида 41 та ўйинда майдонга тушиб, иккита гол урди ва иккита голли узатмани амалга оширди.
