27 март куни ўтказилган ўртоқлик учрашувида Швейцария ва Германия терма жамоалари тўқнаш келишди. Голларга бой кечган баҳс Юлиан Нагельсманн шогирдларининг 4:3 ҳисобидаги ғалабаси билан якунланди.

Ярим ҳимоячи Йозуа Киммих учрашувни тўлиқ ўтказди. Transfermarkt порталининг ҳисоб-китобларига кўра, ушбу ўйин «Бавария»нинг 31 ёшли футболчиси учун «бундесманшафт» таркибидаги 107-учрашув бўлди ва бу унга терма жамоа тарихидаги энг яхши ўнталикка кириш имконини берди.

Германия терма жамоасида Киммихдан кўра кўпроқ ўйин ўтказган футболчилар рўйхати қуйидагича: Юрген Клинсманн (108), Филипп Лам (113), Тони Кроос (114), Бастиан Швайнштайгер (121), Мануэль Нойер (124), Лукас Подольски (130), Томас Мюллер (131), Мирослав Клозе (137) ва Лотар Маттеус (150 ўйин).