Португалия терма жамоаси бош мураббийи Роберто Мартинес ўз фаолияти ҳақида интервью берди. Суҳбат давомида испаниялик мутахассиснинг ҳозирги иши ҳақида ҳам сўз борди.

«Португалия — бу футбол мактаби. У ерда бор-йўғи 10 миллион аҳоли яшайди, шунга қарамай, португалияликлар дунёнинг энг яхши кийиниш хоналарини тўлдиришмоқда. Улар очиқкўнгил, тил ўрганишга тайёр ва Европага интилувчан. Ўз камолотини якунлаш учун мамлакатни тарк этиш истаги бор, бу эса уларга ўта рақобатбардош бўлишга ёрдам беради», — дея Мартинеснинг сўзларини келтирмоқда The Guardian.

«Ҳозирги тайёргарлик тизими шундайки — 15 ёшдан 23 ёшгача бўлган ҳар бир позицияда бир хил элита методологиясига амал қиладиган 8 нафардан футболчи бор. Педру Нету, Витинья, Жоау Невеш ва Ренату Вейга — биз келганимиздан бери уларнинг барчаси асосий таркибга киришди. Бундай ривожланиш даражаси намуна бўла олади», — деб таъкидлади мутахассис.

Жаҳон чемпионатига тайёргарлик доирасида португалияликлар Мексика билан ўртоқлик учрашувида майдонга тушишади. Ўйин 29 март куни бўлиб ўтади ва Тошкент вақти билан тонгги соат 06:00 да бошланади.