Portugaliya terma jamoasi bosh murabbiyi Roberto Martines o‘z faoliyati haqida intervyu berdi. Suhbat davomida ispaniyalik mutaxassisning hozirgi ishi haqida ham so‘z bordi.

«Portugaliya — bu futbol maktabi. U yerda bor-yo‘g‘i 10 million aholi yashaydi, shunga qaramay, portugaliyaliklar dunyoning eng yaxshi kiyinish xonalarini to‘ldirishmoqda. Ular ochiqko‘ngil, til o‘rganishga tayyor va Yevropaga intiluvchan. O‘z kamolotini yakunlash uchun mamlakatni tark etish istagi bor, bu esa ularga o‘ta raqobatbardosh bo‘lishga yordam beradi», — deya Martinesning so‘zlarini keltirmoqda The Guardian.

«Hozirgi tayyorgarlik tizimi shundayki — 15 yoshdan 23 yoshgacha bo‘lgan har bir pozisiyada bir xil elita metodologiyasiga amal qiladigan 8 nafardan futbolchi bor. Pedru Netu, Vitinya, Joau Nevesh va Renatu Veyga — biz kelganimizdan beri ularning barchasi asosiy tarkibga kirishdi. Bunday rivojlanish darajasi namuna bo‘la oladi», — deb ta’kidladi mutaxassis.

Jahon chempionatiga tayyorgarlik doirasida portugaliyaliklar Meksika bilan o‘rtoqlik uchrashuvida maydonga tushishadi. O‘yin 29 mart kuni bo‘lib o‘tadi va Toshkent vaqti bilan tonggi soat 06:00 da boshlanadi.