Миланнинг «Интер» клуби ҳимоячи Алессандро Бастонининг трансфери бўйича келишув доирасида Каталониянинг «Барселона» клубидан бир нафар футболчини қўлга киритиши мумкин. Бу ҳақда Calciomercato журналистлари хабар бермоқда.
Манбанинг маълумотларига кўра, «нерадзуррилар» ярим ҳимоячи Дани Ольмо ва ҳужумчи Ферран Торреснинг хизматларига қизиқиш билдирмоқда. Бастони учун тўланадиган товон пулини камайтириш мақсадида ушбу футболчилардан бири келишувга киритилиши мумкин. Италиялик ҳимоячининг бозор қиймати 70 миллион еврони ташкил этади.
А Сериянинг жорий мавсумида Милан топ-клуби биринчи ўринни эгаллаб турибди. «Интер» ўзининг энг яқин таъқибчисидан олти очко олдинда.
