Уругвай терма жамоаси бош мураббийи Марсело Бьелса ярим ҳимоячи Федерико Вальверденинг ўйинидаги ўзгаришларни алоҳида таъкидлаб ўтди.
27 ёшли футболчи Англия терма жамоасига қарши кечган яқиндаги ўртоқлик учрашувида (1:1) пенальтини аниқ амалга ошириб, навбатдаги голини урди. Мадриднинг «Реал» клуби хавбеки ҳисобида клуб ва терма жамоадаги сўнгги олтита ўйинда жами еттита гол мавжуд.
«Феде ҳар доим жамоага катта ҳисса қўшиб келган, аммо сўнгги ўйинларда у рақиб ҳимоясини издан чиқариш борасида ақл бовар қилмас қобилият намойиш этаётгани ҳам ҳақиқат. Ҳозирда у илгари биз унинг ижросида кўрмаган жиҳатларни кўрсатмоқда», — дея Бьелсанинг сўзларини келтиради Madrid Xtra.
31 март куни уругвайликлар Жазоирга қарши майдонга тушишади.
