Италиянинг «Наполи» клуби ҳужумчиси Маттео Политано Италия терма жамоаси Жаҳон чемпионатига йўл олишига ишончи комил, бироқ Босния миллий жамоаси «чақилмас ёнғоқ» бўлиб чиқиши мумкинлигини тан олди. Бунга асосий сабаб сифатида у кўплаб босниялик футболчилар, хусусан, фахрий ҳужумчи Эдин Жеко Италия А Серияси билан жуда яхши таниш эканлигини кўрсатди.
«Бу бизни хавотирга соляпти, айниқса Жеко. Аммо биз бор эътиборимизни рақиб ҳақида ўйлашга эмас, балки ўз ўйинимизга қаратишимиз керак», — дея Маттео Политанонинг сўзларини calcionapoli1926.it нашри келтирмоқда.
Эслатиб ўтамиз, Жаҳон чемпионати йўлланмаси тақдири сешанба оқшомида Босния ҳудудидаги Зеница шаҳрида бўлиб ўтадиган баҳсда ҳал бўлади.
