Бразилия терма жамоаси бош мураббийи Карло Анчелотти 40 ёшида ҳам «Милан» таркибида юқори даражадаги ўйин кўрсатаётган Лука Модрич ҳақида ўз фикрларини билдирди.
«Модрич ҳали ҳам ўйин тақдирини ҳал қиляптими? Бу алоҳида ҳолат, чунки Мадриднинг «Реал» клубидаги фаолиятимнинг сўнгги йилида, у 39 ёшда бўлишига қарамай, бирорта ҳам машғулотни ўтказиб юбормаган эди. У нафақат руҳий, балки жисмоний жиҳатдан ҳам аъло ҳолатда», — деди Анчелотти.
Лука Модричнинг «Милан» билан амалдаги шартномаси 2026 йилнинг ўрталаригача мўлжалланган. Нуфузли Transfermarkt портали хорватиялик футболчини 4 миллион еврога баҳоламоқда.
