Мюнхеннинг «Бавария» клуби дарвозабони, 40 ёшли Мануэль Нойер ўз келажаги борасида ҳали бир қарорга келмаган. Бу ҳақда журналист Кристиан Фальк хабар бермоқда.

Манбанинг маълумотларига кўра, Нойер шу ёзда фаолиятини якунлаш ёки якунламаслик масаласини ҳали ҳал қилмаган. Таъкидланишича, голкипер бу масалани Чемпионлар Лигаси чорак финали доирасида Мадриднинг «Реал» клубига қарши кечадиган баҳслар якунига қадар кечиктиришга қарор қилган.

Ушбу мавсумда Нойер барча турнирларда 29 та ўйин ўтказиб, 27 та гол ўтказиб юборди ва ўнта учрашувда ўз дарвозаси дахлсизлигини сақлаб қолди.

Нойернинг «Бавария» билан амалдаги меҳнат шартномаси жорий йилнинг июнь ойи охирида ўз ниҳоясига етади.