Испания терма жамоаси бош мураббийи Луис де ла Фуэнте Миср термасига қарши ўртоқлик учрашуви (31 март) олдидан қанот ҳужумчиси Ламин Ямалнинг ривожланиши ҳақида фикр билдирди.

«Ламин икки йил олдинга қараганда анча яхши ўйнаяпти, аммо яна икки йилдан кейин қандай бўлишини ҳисобга олсак, ҳозирча у даражага етгани йўқ. У жиддий равишда етуклашди, жамоага қўшаётган ҳиссаси ҳам ошди. У жамоадошлари учун жуда ёқимли инсон. Ҳар куни у жамоага тобора кўпроқ таъсир ўтказмоқда ва уни янада кучлироқ қилмоқда. Унинг олдида ҳали узоқ йўл бор ва энг яхши йиллари ҳали олдинда. У аъло формада, руҳий ҳолати ҳам идеал, жуда тезкор, ўйинида ўша ёрқинлик бор ва ҳозир карьерасининг энг яхши паллаларидан бирида», — деди де ла Фуэнте Sport.es нашрига берган интервьюсида.

Жорий мавсумда Ямал «Барселона» сафида барча мусобақаларда 40 та учрашувда иштирок этиб, 21 та гол урди ва 14 та голли узатмани амалга оширди.