Аргентина терма жамоаси бош мураббийи Лионель Скалони Замбияга қарши ўртоқлик учрашуви олдидан ўз фикрларини билдирди. У «альбиселесте»нинг Мавританияга қарши кечган ва 2:1 ҳисобидаги ишончсиз ғалаба билан якунланган аввалги ўйини мавзусига тўхталиб ўтди.
«Улар ўйин муваффақиятсиз бўлганини тушуниб етганлари яхши. Ўтган сафар биз яхлит бир жамоа бўлиб ўйнай олмадик. Бу йигитлар шунчаки профессионал эмас — улар жуда маҳоратли ва бирдам жамоа. Ҳозир қайси босқичда эканимизни баҳолаш учун қулай вақт. Умид қиламизки, бу (муваффақиятсиз ўйин) шунчаки бир марталик ҳолат бўлиб қолади», — дея Скалонининг сўзларини ESPN нашри келтирмоқда.
Аввалроқ Скалони Лионель Месси Замбияга қарши учрашувнинг илк дақиқалариданоқ майдонга тушишини ваъда қилган эди. Ўйин 1 апрель куни бўлиб ўтади, Тошкент вақти билан старт ҳуштаги тунги соат 04:15 да янграйди.
