«Спортинг» клубининг колумбиялик ҳужумчиси Луис Суарес фаолиятини Англия Премьер-лигасида давом эттириши мумкин. Бу ҳақда Correio da Manha нашри хабар бермоқда.

Манбанинг маълумотларига кўра, 28 ёшли футболчининг хизматларига «Ливерпуль» ва «Ньюкасл» клублари қизиқиш билдирмоқда.

Жорий мавсумда Суарес барча турнирларни ҳисобга олган ҳолда 42 та ўйинда иштирок этди, рақиблар дарвозасини 33 бор ишғол қилди ва еттита голли узатмани амалга оширди. Таъкидлаш жоизки, ҳужумчи 24 та гол билан Португалия чемпионати тўпурарлар пойгасида пешқадамлик қилмоқда.

Суареснинг «Спортинг» билан амалдаги шартномаси 2030 йилга қадар мўлжалланган. Transfermarkt портали маълумотларига кўра, Суареснинг бозор қиймати 28 миллион еврони ташкил этади.