Англия терма жамоаси ҳимоячиси Гарри Магуайр «Манчестер Юнайтед» билан янги шартнома имзолайди. Келишув 2027 йилгача амал қилади ва уни яна бир мавсумга узайтириш имконияти кўзда тутилади. Бу ҳақда ESPN нашри хабар бермоқда.
Нашр маълумотларига кўра, футболчи ва клуб вакиллари ўртасидаги музокаралар ижобий баҳоланмоқда. Ҳар икки томон тез орада келишув якунига етишидан умидвор.
Жорий мавсумда «қизил иблислар» ҳимоячиси клуб сафида барча турнирларда 20 та ўйинда майдонга тушиб, битта гол урди ва битта голли узатмани амалга оширди. Футболчининг клуб билан амалдаги меҳнат шартномаси 2026 йилнинг ёзига қадар мўлжалланган. Transfermarkt портали тақдим этган маълумотларга кўра, футболчининг бозор қиймати 10 миллион еврони ташкил этади.
