Испания терма жамоаси бош мураббийи Луис де ла Фуэнте «Эспаньол» мухлислари дарвозабон Жоан Гарсияни ҳуштаклар билан кутиб олишлари мумкинлиги ҳақидаги хабарларга муносабат билдирди.
«Мухлислар миллий терма жамоани қўллаб-қувватлаш учун келишлари керак. Бу ерда биз қайсидир клуб шарафини эмас, балки терма жамоа шарафини ҳимоя қиляпмиз. Агар кимдир кайфиятимизни бузиш учун келмоқчи бўлса, яхшиси уйида қолгани маъқул», — деди де ла Фуэнте.
«Барселона»нинг 24 ёшли посбони Жоан Гарсия ўтган ёзда «Эспаньол»дан «кўк-анорранглилар» лагерига кўчиб ўтган эди. У ҳозиргача Испания терма жамоаси сафида дебют қилгани йўқ.
Сешанба куни, 31 март куни Испания терма жамоаси Мисрга қарши ўртоқлик учрашувини ўтказади. Ўйин Тошкент вақти билан тунги соат 00:00 да старт олади.
