"Бавария" ярим ҳимоячиси Жамал Мусиала келажакда фаолиятини Испанияда давом эттириши мумкин. TEAMtalk нашрининг хабарига кўра, германиялик футболчининг узоқ муддатли орзуси — "Барселона" сафида тўп суришдир.
Агар "кўк-анорранглилар" унга таклиф билан чиқишса, хавбек Каталония клубига ўтишга рози бўларди.
Жамал Мусиала 2019 йилда "Челси"дан "Бавария"га бор-йўғи 200 минг евро эвазига ўтган эди. Унинг амалдаги шартномаси 2030 йилнинг 30 июнига қадар мўлжалланган.
Жорий мавсумда ярим ҳимоячи Мюнхен клуби сафида барча мусобақаларда 11 та ўйин ўтказиб, 3 та гол урди ва 2 та голли узатмани амалга оширди. Футболчи жароҳати сабабли жорий мавсумнинг катта қисмини ўтказиб юборди.
