Уругвай терма жамоаси бош мураббийи Марсело Бьелса ярим ҳимоячи Федерико Вальверденинг кучли томонлари ҳақида ўз фикрлари билан ўртоқлашди.

27 ёшли футболчи мунтазам равишда гол уришни бошлади — унинг Мадриднинг «Реал» клуби ва миллий терма жамоа сафидаги охирги 7 та ўйинида 7 та голи бор.

«Вальверде ўз позициясидаги барча футболчилардан фарқ қилади. У ярим ҳимоянинг исталган нуқтасида ўйнай олади, ҳимоянинг ўнг қанотида тажрибага эга, сўнгги вақтларда эса ҳужум қанотида ўйнаб ҳамманинг эътиборини тортди. Одатда у ўнг қанотдан хавф солади, лекин биз унинг чап қанот бўйлаб ёриб киришларини ҳам кўрганмиз. Ҳатто Педри ва Витинья каби ўйинчилар ҳам Федедаги каби кўп қирралиликка эга эмас — айнан шу хусусият уни бошқалардан ажратиб туради. Шубҳасиз, у дунёнинг энг яхши футболчилари қаторига киради», — деди Бьелса матбуот анжуманида.

Эслатиб ўтамиз, сешанба куни уругвайликлар Жазоир терма жамоаси билан дуранг ўйнашди (0:0).