Португалия терма жамоаси бош мураббийи Роберто Мартинес ўртоқлик учрашувида АҚШ устидан қозонилган ғалабадан (2:0) сўнг жамоа ўйини ҳақидаги фикрлари билан ўртоқлашди.
Португалияликлар 37 ва 59-дақиқаларда Франсишку Тринкан ҳамда Жоау Феликс томонидан киритилган голлар эвазига зафар қучишди. Бундан аввалги баҳсда Мартинес шогирдлари Мексикани мағлуб эта олишмаган эди (0:0).
«Ҳар иккала ўйиннинг иккинчи бўлимида биз яхшироқ ҳаракат қилдик. Кўринишидан, барча футболчиларнинг бир-бири билан тил топишиб, мослашиб кетиши учун бизга кўпроқ вақт керак бўлмоқда. Бугун Мексикага қарши ўйин билан солиштирганда ўсишни кўрдик. АҚШ терма жамоаси жисмоний жиҳатдан жуда кучли — бу жиддий рақиб. Европадан бўлмаган жамоаларга қарши ўйнаганимиздан хурсандман, бу бизга мослашиб олишимиз учун осонроқ бўлади», — деди Роберто Мартинес ўз интервьюсида.
Эслатиб ўтамиз, бўлажак мундиалда Португалия терма жамоасига ДР Конго, Ўзбекистон ва Колумбия терма жамоалари рақиблик қилади.
