Португалия терма жамоаси бош мураббийи Роберто Мартинес ЖЧ-2026 арафасида Криштиану Роналдунинг истиқболлари ҳақидаги саволга жавоб берди.

41 ёшли ҳужумчи жароҳати сабабли португалияликларнинг март ойидаги йиғинини ўтказиб юборди. «Ан-Наср» юлдузи февраль ойи охиридан бери майдонга тушмаётган бўлса-да, афтидан, тез орада сафга қайтади.

«Роналдунинг тикланиш жараёни яхши кетмоқда — унинг жаҳон чемпионатидаги иштироки борасида ҳеч қандай шубҳа бўлмаслиги керак. Аммо у ҳам бошқа футболчиларимиз каби тенг ҳуқуқли аъзо ва қолган 60 кун ичида биз ҳар бир ўйинчининг ҳолатини синчковлик билан кузатиб борамиз. Ҳозирда шуниси аниқки, бу жароҳат Криштианунинг турнирда қатнашишига ҳеч қандай хавф туғдирмайди», — дея Мартинеснинг сўзларини келтирмоқда Al Nassr Zone.

Кеча тунда Португалия терма жамоаси ўртоқлик учрашувида АҚШлик рақибларини мағлубиятга учратди (2:0).