Эрон футбол федерацияси вице-президенти Меҳди Муҳамад Наби FIFA президенти Жанни Инфантинонинг Эрон миллий жамоаси 2026 йилги жаҳон чемпионатида иштирок этиши ҳақидаги сўзларига муносабат билдирди.
«Биз учун энг муҳими — FIFA қоидалари ва регламентларидир. Биз ташкилотнинг ҳар қандай қарорини ҳурмат қиламиз. Ҳар бир мезбон давлат FIFA олдида мажбурият олган ва уларга амал қилиши шарт. У бизнинг ўртоқлик ўйинлари ўтказаётганимизни билгач, шахсан келди ва самарали суҳбат бўлиб ўтди», — деди функционер.
Аввалроқ Эрон футбол федерацияси президенти Меҳди Тож терма жамоа ўйинларини 2026 йилги жаҳон чемпионатида АҚШдан Мексикага кўчириш бўйича музокаралар олиб борилаётганини маълум қилган эди.
Шунингдек, Эронда мавжуд геосиёсий вазият туфайли терма жамоанинг ЖЧ-2026да иштирок этмаслиги эҳтимоли ҳам айтилган. АҚШ президенти Доналд Трамп эса Эрон миллий жамоасининг мусобақада қатнашишини номақбул деб ҳисоблашини билдирган.













