Швеция терма жамоаси ҳал қилувчи баҳсда Польша устидан 3:2 ҳисобида ғалаба қозониб, Жаҳон чемпионати йўлланмасини қўлга киритди. Польшада ҳакамликдан норозилик ва афсус надоматлари авж олган бир пайтда, қизиқ бир факт ойдинлашди: швецияликлар Жаҳон чемпионатлари тарихида саралаш гуруҳида охирги ўринни эгаллаб туриб, финал босқичига йўл олган илк жамоага айланди.
Швециянинг бу муваффақиятига Миллатлар Лигасидаги натижалари сабаб бўлди — айнан ушбу турнир уларга Мундиал эшикларини қайта очиб берди. Таъкидлаш жоизки, Швеция терма жамоаси Жаҳон чемпионатларининг доимий иштирокчиси ҳисобланади ва ҳатто финалгача етиб борган. Бу воқеа 1958 йилда, мамлакат мезбонлик қилган турнирда юз берган. Шунингдек, жамоа нисбатан яқин ўтмишда — 1994 йилги чемпионатда ҳам ярим финалга қадар етиб борган эди.
