«Бавария» футболчиси Конрад Лаймер жамоа нима сабабдан жорий мавсумда бунчалик ажойиб натижалар кўрсатаётгани ҳақида сўзлаб берди.

Мюнхенликлар Бундеслигада ишонч билан пешқадамлик қилмоқда ва урилган голлар сони бўйича чемпионат рекордини янгилаш сари бормоқда. Чемпионлар Лигасида эса Венсан Компани шогирдлари ҳеч қандай қийинчиликсиз чорак финалгача етиб келишди ва энди у ерда Мадриднинг «Реал» клуби билан куч синашишади.

«Биз чиройли футбол ўйнаяпмиз. Мураббийнинг аниқ режаси бор ва у буни бизга жуда яхши тушунтириб беради. Ҳар бир ўйинчи майдонда нима қилиши кераклигини аниқ билади. Барчамизнинг амбицияларимиз юқори. «Бавария»да ўзингни қандайдир ўзига хос нарсанинг бир қисмидек ҳис қиласан ва умумий муваффақият учун ҳар куни бор кучингни беришга тайёр турасан. Бу жамоада тўп суриш жуда ёқимли», – деди Лаймер Servus Nachrichten нашрига берган интервьюсида.

«Бавария»нинг навбатдаги учрашуви 4 апрель куни «Фрайбург» жамоасига қарши бўлиб ўтади.