«Bavariya» futbolchisi Konrad Laymer jamoa nima sababdan joriy mavsumda bunchalik ajoyib natijalar ko‘rsatayotgani haqida so‘zlab berdi.

Myunxenliklar Bundesligada ishonch bilan peshqadamlik qilmoqda va urilgan gollar soni bo‘yicha chempionat rekordini yangilash sari bormoqda. Chempionlar Ligasida esa Vensan Kompani shogirdlari hech qanday qiyinchiliksiz chorak finalgacha yetib kelishdi va endi u yerda Madridning «Real» klubi bilan kuch sinashishadi.

«Biz chiroyli futbol o‘ynayapmiz. Murabbiyning aniq rejasi bor va u buni bizga juda yaxshi tushuntirib beradi. Har bir o‘yinchi maydonda nima qilishi kerakligini aniq biladi. Barchamizning ambisiyalarimiz yuqori. «Bavariya»da o‘zingni qandaydir o‘ziga xos narsaning bir qismidek his qilasan va umumiy muvaffaqiyat uchun har kuni bor kuchingni berishga tayyor turasan. Bu jamoada to‘p surish juda yoqimli», – dedi Laymer Servus Nachrichten nashriga bergan intervyusida.

«Bavariya»ning navbatdagi uchrashuvi 4 aprel kuni «Frayburg» jamoasiga qarshi bo‘lib o‘tadi.