«Челси» футболчилари жамоадоши Энцо Фернандеснинг хатти-ҳаракатларидан норози бўлишмоқда. Жамоа аъзолари аргентиналик ярим ҳимоячининг қилмишлари сўнгги ойларда юзага келган қийинчиликларни енгиб ўтишга ҳеч қандай ёрдам бермаяпти, деб ҳисоблашмоқда, дея хабар беради The Telegraph.
Манбанинг таъкидлашича, Фернандес кетма-кет тўртта мағлубиятдан сўнг шерикларини кескин тарзда танқид қилган ва бу бошқа футболчиларга маъқул келмаган. 25 ёшли хавбекнинг ҳаддан ташқари ҳиссиётларга берилиши айримлар томонидан ортиқча деб кўрилмоқда.
Сўнгги вақтларда Энцо Фернандеснинг «Челси»ни тарк этиши ҳақидаги хабарлар тез-тез қулоққа чалинмоқда. Transfermarkt портали томонидан 90 миллион еврога баҳоланган футболчи учун асосий даъвогар Мадриднинг «Реал» клуби бўлиб турибди.
