Дортмунднинг «Боруссия» клуби ҳимоячиси Вальдемар Антон «қизил иблислар»нинг навбатдаги трансфер ойнаси учун асосий нишонига айланди. Бу ҳақда Bild нашри хабар бермоқда.
Бундан 29 йил аввал Ўзбекистоннинг Олмалиқ шаҳрида туғилган Антон жорий мавсумда дортмундликларнинг ишончли вакилига айланди ва жамоа таркибида 38 та ўйинда майдонга тушди. Шунингдек, у март ойидаги Швейцария ва Ганага қарши ўртоқлик учрашувларига чақирилмаган бўлса-да, Германия терма жамоасининг Жаҳон чемпионати учун кенгайтирилган таркибидан жой олиши кутилмоқда.
Бундан ташқари, Антоннинг хизматларига Мадриднинг «Атлетико» клуби ҳам қизиқиш билдирмоқда. Мадридликлар ҳимоячини ҳали у «Штутгарт» шарафини ҳимоя қилиб юрган йиллардаёқ ўз сафига қўшиб олишга уринишган эди. Transfermarkt портали Вальдемар Антонни 18 миллион еврога баҳоламоқда.
