Босниялик машҳур собиқ футболчи Хасан Салихамиджич Италия терма жамоасининг яқиндаги муваффақиятсизлиги ҳақида фикр билдирди.
«Скуадра адзурра» Жаҳон чемпионати йўлланмаси учун кечган плей-офф финалида Босния ва Герцеговинага мағлуб бўлди. Мундиал йўлланмаси тақдирини пенальтилар серияси ҳал қилди ва унда боснияликлар 4:1 ҳисобида устун келдилар.
«Италия футболи қийин дамларни бошдан кечирмоқда. Мен учун бу борада «Ювентус» барометр вазифасини ўтайди: қачонки клубда яхши давр бўлмаса, Италия терма жамоаси ҳам қийинчиликларга дуч келади», — дея ўз вақтида «кекса синьора» сафида тўп сурган Салихамиджичнинг сўзларини келтиради Италия ОАВлари.
Италия терма жамоаси ўз тарихида илк бор қаторасига учинчи Жаҳон чемпионатини ўтказиб юборадиган бўлди.
