Италия терма жамоасида катта ўзгаришлар кутилмоқда: яқин орада Женнаро Гаттузонинг ўрнига янги бош мураббий тайинланиши мумкин.
«Скуадра адзурра» ўтиш ўйинларининг финалида Босния ва Герцеговина терма жамоасига пенальтилар сериясида имкониятни бой бериб, яна Жаҳон чемпионатидан қуруқ қолди. Ушбу муваффақиятсизликдан сўнг Гаттузо бош мураббийлик лавозимини тарк этиши кутилмоқда. Журналист Николо Скиранинг маълумотларига кўра, Италия футбол федерацияси айни дамда «Наполи» клубида фаолият юритаётган Антонио Контенинг тайинланишини орзу қилмоқда. Шунингдек, қайтишга тайёр эканини билдирган Роберто Манчинининг келиши ҳам эҳтимолдан холи эмас.
Антонио Конте 2014 йилдан 2016 йилгача Италия терма жамоасини бошқарган, Роберто Манчини эса 2018 йилдан 2023 йилгача ушбу лавозимда ишлаган.
