Неймарнинг терма жамоага эҳтимолий қайтиши — Жаҳон чемпионати арафасида Бразилия футболидаги энг кўп муҳокама қилинаётган мавзулардан бири бўлиб турибди.
«Сантос»нинг 34 ёшли футболчиси «пентакампеонлар»нинг март ойидаги йиғинига таклиф этилмади, бироқ у ҳамон бўлажак мундиалга боришдан умид қилмоқда. The Touchline нашри берган маълумотларга кўра, Бразилия терма жамоаси Неймарни ЖЧ-2026 қайдномасига киритишни режалаштирмаяпти. Афтидан, юлдуз ҳужумчи энди терма жамоаларнинг бош турнирида бошқа майдонга тушмайди.
Бразилия ОАВлари, шунингдек, Карло Анчелотти бошчилигидаги мураббийлар штаби келаётган ёзда Неймарни миллий жамоа сафига чақирмаслик ниятида эканлигини хабар қилди. Шу билан бирга, «селесао» вакиллари «Сантос» иштирокидаги ўйинларни кузатишда давом этадилар.
