Neymarning terma jamoaga ehtimoliy qaytishi — Jahon chempionati arafasida Braziliya futbolidagi eng ko‘p muhokama qilinayotgan mavzulardan biri bo‘lib turibdi.
«Santos»ning 34 yoshli futbolchisi «pentakampeonlar»ning mart oyidagi yig‘iniga taklif etilmadi, biroq u hamon bo‘lajak mundialga borishdan umid qilmoqda. The Touchline nashri bergan ma’lumotlarga ko‘ra, Braziliya terma jamoasi Neymarni JCH-2026 qaydnomasiga kiritishni rejalashtirmayapti. Aftidan, yulduz hujumchi endi terma jamoalarning bosh turnirida boshqa maydonga tushmaydi.
Braziliya OAVlari, shuningdek, Karlo Anchelotti boshchiligidagi murabbiylar shtabi kelayotgan yozda Neymarni milliy jamoa safiga chaqirmaslik niyatida ekanligini xabar qildi. Shu bilan birga, «selesao» vakillari «Santos» ishtirokidagi o‘yinlarni kuzatishda davom etadilar.
