29 март куни Ўзбекистон кубоги гуруҳ босқичида иштирок этадиган барча — 32 та клуб номи маълум бўлди. Бугун улар ўз рақибларини билиб олади.

Миллий жамоанинг мундиал олди йиғинидан келиб чиқиб, 5 майдан эътиборан Суперлига катта танаффусга чиқади. Ўртадаги бўшлиқни тўлдириш мақсадида Лига ва клублар ўзаро келишган ҳолда 8–26 май саналари оралиғида Ўзбекистон кубогининг гуруҳ босқичини ўтказишга қарор қилди. Эндиликда, клуб миллий жамоа йиғинига қанча футболчисини беришидан қатъи назар, кубок ўйинини ўтказади.

Қуръа тартиби ва саватчалар:

Ўз футболчиларини терма жамоа ихтиёрига жўнатаётган клублар манфаатидан келиб чиқиб, иштирокчилар регламент асосида саватчаларга бўлиб чиқилган. Бир саватчадан жой олган клублар гуруҳда ўзаро рақиб бўлмайди.

• Имтиёз: Биринчи саватчадан жой олган 8 та клуб гуруҳ босқичидаги 2 та учрашувни ўз майдонида ўтказади.

• Мезбонлик масаласи: Қолган учта саватчадан фақат биттасига 2 та ўйинни ўз уйида ўтказиш насиб қилади (қуръа орқали), қолган икки сават вакиллари эса 2 та ўйинни сафарда ўтказади.

Қуръа жараёни:

Қуръа жараёни 15:00 да старт олади ва Лиганинг расмий саҳифалари орқали жонли намойиш этилади. Дастлаб 4-саватча, сўнгра 3, 2 ва якунда 1-саватча клублари гуруҳларга тақсимланади. Тадбирга медиа соҳаси вакиллари меҳмон сифатида таклиф этилган.