29 mart kuni O‘zbekiston kubogi guruh bosqichida ishtirok etadigan barcha — 32 ta klub nomi ma’lum bo‘ldi. Bugun ular o‘z raqiblarini bilib oladi.
Milliy jamoaning mundial oldi yig‘inidan kelib chiqib, 5 maydan e’tiboran Superliga katta tanaffusga chiqadi. O‘rtadagi bo‘shliqni to‘ldirish maqsadida Liga va klublar o‘zaro kelishgan holda 8–26 may sanalari oralig‘ida O‘zbekiston kubogining guruh bosqichini o‘tkazishga qaror qildi. Endilikda, klub milliy jamoa yig‘iniga qancha futbolchisini berishidan qat’i nazar, kubok o‘yinini o‘tkazadi.
Qur’a tartibi va savatchalar:
O‘z futbolchilarini terma jamoa ixtiyoriga jo‘natayotgan klublar manfaatidan kelib chiqib, ishtirokchilar reglament asosida savatchalarga bo‘lib chiqilgan. Bir savatchadan joy olgan klublar guruhda o‘zaro raqib bo‘lmaydi.
-
Imtiyoz: Birinchi savatchadan joy olgan 8 ta klub guruh bosqichidagi 2 ta uchrashuvni o‘z maydonida o‘tkazadi.
-
Mezbonlik masalasi: Qolgan uchta savatchadan faqat bittasiga 2 ta o‘yinni o‘z uyida o‘tkazish nasib qiladi (qur’a orqali), qolgan ikki savat vakillari esa 2 ta o‘yinni safarda o‘tkazadi.
Qur’a jarayoni:
Qur’a jarayoni 15:00 da start oladi va Liganing rasmiy sahifalari orqali jonli namoyish etiladi. Dastlab 4-savatcha, so‘ngra 3, 2 va yakunda 1-savatcha klublari guruhlarga taqsimlanadi. Tadbirga media sohasi vakillari mehmon sifatida taklif etilgan.
