"Парма" ҳимоячиси Мандела Кейта "Интер"нинг қизиқишлар доирасига тушиб қолди. Linterista нашрининг хабарига кўра, Милан клуби бош мураббийи Кристиан Киву шахсан 23 ёшли бельгиялик футболчини сотиб олиш тарафдори бўлиб чиқмоқда.

Руминиялик мутахассис ўтган мавсумда "Парма"да Кейта билан бирга ишлаган ва футболчининг маҳоратига тўлиқ ишонади. Эслатиб ўтамиз, Мандела Кейта 2024 йилда "Антверпен"дан "Парма"га 12 миллион евро эвазига ўтган эди. Унинг амалдаги шартномаси 2029 йил 30 июнга қадар мўлжалланган.

Жорий мавсумда ҳимоячи барча мусобақаларда 32 та ўйинда майдонга тушиб, битта голли узатмани амалга оширди. Transfermarkt портали Кейтанинг бозор қийматини 18 миллион еврога баҳоламоқда.