«Манчестер Юнайтед» клубининг собиқ ярим ҳимоячиси Пол Скоулз қаторасига учинчи бор Жаҳон чемпионатига чиқа олмаган Италия терма жамоаси ҳақида ўз фикрларини билдирди.
«Италия терма жамоалар орасидаги «Арсенал»га ўхшаб қолган. Бу жамоанинг иштиёқи ҳамон ўтмишдаги шонли хотираларга таянади. Италия жамоасида аниқ йўналиш етишмаяпти, у ягона тизим сифатида ишламаяпти. Ҳамма нарса индивидуал ҳаракатларга боғланиб қолган, умумий ўйин эса жуда суст кўринмоқда», — деди Скоулз Corriere dello Sport нашрига берган интервьюсида.
«Бу биз 90-йиллар ёки 2000-йиллар бошидан эслайдиган ўша Италия эмас. Паоло Мальдини, Фабио Каннаваро, Андреа Пирло, Франческо Тотти ёки Жанлуиджи Буффон каби афсоналардаги эҳтиросдан асар ҳам қолмаган», — дея қўшимча қилди Скоулз.
Эслатиб ўтамиз, Италия Жаҳон чемпионатига чиқиш учун кечган ҳал қилувчи баҳсда Босния ва Герцеговина терма жамоасига пенальтилар сериясида имкониятни бой берди.
