Ромелу Лукаку клуб раҳбарияти билан юзага келган низодан сўнг «Наполи»ни тарк этиши мумкин. La Gazzetta dello Sport нашрининг хабар беришича, марказий ҳужумчида фаолиятини Туркияда давом эттириш варианти пайдо бўлган.

Манбага кўра, айни дамда Доменико Тедеско бошқараётган «Фенербахче» клуби ҳужумчига қизиқиш билдирмоқда. Мутахассис Бельгия терма жамоасида Лукаку билан бирга ишлаш тажрибасига эга. Бироқ ҳужумчининг ўзи қарор қабул қилишга шошилмаяпти — агар вазият янада ёмон томонга ўзгармаса, у Италияда қолиш ниятида.

Эслатиб ўтамиз, яқинда «Наполи» раҳбарлари бельгиялик футболчига уни асосий таркибдан четлатиш билан таҳдид қилишган эди. Бунга ҳужумчининг клуб рухсатисиз Бельгияда мустақил равишда машғулот ўтказгани сабаб бўлган.

Жорий мавсумда 32 ёшли Лукаку «Наполи» сафида еттита ўйинда майдонга тушиб, ўз ҳисобига битта гол ёздириб қўйган.