Мадриднинг «Атлетико» клуби ҳужумчи Хулиан Альварес билан амалдаги шартномани узайтиришдан умид қилмоқда.

26 ёшли футболчига «Барселона» даъвогарлик қилмоқда, бироқ «матрасчилар» раҳбарияти ўз юлдузини жамоада олиб қолишда қатъий қарорга келган. Журналист Маттео Мореттонинг маълумотларига кўра, Мадрид клуби Альвареснинг агенти билан шартномани узайтириш бўйича музокараларни бошлаган. Агар ҳужумчи розилик берса, унинг маоши сезиларли даражада оширилади.

Хулиан Альвареснинг «Атлетико» билан айни дамдаги келишуви 2030 йилгача мўлжалланган. «Барселона» эса аргентиналик футболчига қизиқиш билдиришда давом этмоқда ва агар у ҳозирги клуби билан янги битим тузишдан бош тортса, уни ўз томонига оғдириб олишга ҳаракат қилади.