«Манчестер Сити» ҳужумчиси Эрлинг Холанд ўз келажаги борасида муҳим қарорга келди. El Nacional нашрининг хабар беришича, норвегиялик тўпурар ўз агенти Рафаэла Пиментадан бошқа клублар билан музокараларни тўхтатишни сўраган. Холанд камида 2027 йилнинг ёзига қадар инглиз клубида қоладиган бўлди. Ўша вақтга келиб, унинг шартномасидаги товон пули миқдори тахминан 150 миллион еврогача тушади.

Манбага кўра, Холанд «Барселона» унинг трансферини молиявий жиҳатдан амалга ошира оладиган вақтни кутмоқчи. Жорий йилда бундай трансфернинг иложи йўқ. Эрлинг яна бир йил кутишга тайёр ва 2027 йилда «кўк-анорранглилар» уни сотиб олишига умид қилмоқда.

Қайд этилишича, Холандни Ханс-Дитер Флик лойиҳаси ўзига жалб этган. Норвегиялик футболчи Ламин Ямал ва Рафинья билан биргаликда ҳужумкор учликни ташкил этишни истамоқда.

Аввалроқ, Эрлинг Холанднинг номи Мадриднинг «Реал» клуби билан боғлаб келинаётган эди.