Колумбия миллий терма жамоаси ярим ҳимоячиси Хамес Родригес Франция термасига қарши ўртоқлик учрашувидан (1:3) сўнг шошилинч равишда шифохонага ётқизилди.

«Колумбия футбол федерацияси тиббий штаб ва терма жамоалар департаменти орқали жамоа сардори Хамес Родригеснинг соғлиғи ҳақида жамоатчилик ва ОАВга маълумот беради.

Миннесота штатидаги тиббиёт муассасаси билан алоқа ўрнатилгандан сўнг маълум бўлишича, ярим ҳимоячи спортга боғлиқ бўлмаган соғлиқ муаммоси сабабли мутахассислар назорати остида бўлган. Францияга қарши ўйиндан кейинги куни унда кучли сувсизланиш аниқланган ва шу сабабли у сўнгги 72 соат давомида шифохонада профилактик кузатув ҳамда тикланиш жараёнида бўлди.

Алоҳида таъкидлаш жоизки, ушбу ҳолат таянч-ҳаракат тизими жароҳатлари билан боғлиқ эмас ва унинг футбол фаолиятига алоқаси йўқ. Яхшиямки, сўнгги тиббий маълумотларга кўра, футболчининг аҳволи яхшиланмоқда ва ижобий динамика кузатилмоқда», — дейилади Колумбия футбол федерацияси баёнотида.

Родригес учрашувни асосий таркибда бошлади ва 63-дақиқада алмаштирилди.