Kolumbiya milliy terma jamoasi yarim himoyachisi Xames Rodriges Fransiya termasiga qarshi o‘rtoqlik uchrashuvidan (1:3) so‘ng shoshilinch ravishda shifoxonaga yotqizildi.

«Kolumbiya futbol federasiyasi tibbiy shtab va terma jamoalar departamenti orqali jamoa sardori Xames Rodrigesning sog‘lig‘i haqida jamoatchilik va OAVga ma’lumot beradi.

Minnesota shtatidagi tibbiyot muassasasi bilan aloqa o‘rnatilgandan so‘ng ma’lum bo‘lishicha, yarim himoyachi sportga bog‘liq bo‘lmagan sog‘liq muammosi sababli mutaxassislar nazorati ostida bo‘lgan. Fransiyaga qarshi o‘yindan keyingi kuni unda kuchli suvsizlanish aniqlangan va shu sababli u so‘nggi 72 soat davomida shifoxonada profilaktik kuzatuv hamda tiklanish jarayonida bo‘ldi.

Alohida ta’kidlash joizki, ushbu holat tayanch-harakat tizimi jarohatlari bilan bog‘liq emas va uning futbol faoliyatiga aloqasi yo‘q. Yaxshiyamki, so‘nggi tibbiy ma’lumotlarga ko‘ra, futbolchining ahvoli yaxshilanmoqda va ijobiy dinamika kuzatilmoqda», — deyiladi Kolumbiya futbol federasiyasi bayonotida.

Rodriges uchrashuvni asosiy tarkibda boshladi va 63-daqiqada almashtirildi.