Италиядан сўнг VAR тизими қарорларини жонли эфирда эълон қилиш «модаси»ни Франция ҳам қабул қилмоқда. Эътиборлиси, ушбу янгилик кечиктирилмасдан — шу дам олиш кунларидаёқ синовдан ўтказилади. Жума оқшомида бўлиб ўтадиган «ПСЖ» ва «Тулуза» ўртасидаги баҳс бу борадаги илк учрашувга айланади. Парижликлар келаси ҳафтадаги Чемпионлар лигаси ўйинлари сабабли ички чемпионат баҳсини одатдагидан эртароқ ўтказишмоқда.

Ушбу лойиҳани амалга ошириш учун ҳакамлар зарур техник жиҳозлар билан таъминланади. Янгиликдан кўзланган асосий мақсад — ҳакамлар томонидан қабул қилинаётган у ёки бу қарорларнинг шаффофлик даражасини оширишдан иборат.

Эслатиб ўтамиз, «ПСЖ» Франция чемпионати турнир жадвалида пешқадамлик қилмоқда, бироқ иккинчи ўриндаги «Ланс» билан фарқ атиги бир очкони ташкил этади. Шу билан бирга, парижликлар ҳисобида ҳали битта захира ўйини мавжуд.