Italiyadan so‘ng VAR tizimi qarorlarini jonli efirda e’lon qilish «modasi»ni Fransiya ham qabul qilmoqda. E’tiborlisi, ushbu yangilik kechiktirilmasdan — shu dam olish kunlaridayoq sinovdan o‘tkaziladi. Juma oqshomida bo‘lib o‘tadigan «PSJ» va «Tuluza» o‘rtasidagi bahs bu boradagi ilk uchrashuvga aylanadi. Parijliklar kelasi haftadagi Chempionlar ligasi o‘yinlari sababli ichki chempionat bahsini odatdagidan ertaroq o‘tkazishmoqda.
Ushbu loyihani amalga oshirish uchun hakamlar zarur texnik jihozlar bilan ta’minlanadi. Yangilikdan ko‘zlangan asosiy maqsad — hakamlar tomonidan qabul qilinayotgan u yoki bu qarorlarning shaffoflik darajasini oshirishdan iborat.
Eslatib o‘tamiz, «PSJ» Fransiya chempionati turnir jadvalida peshqadamlik qilmoqda, biroq ikkinchi o‘rindagi «Lans» bilan farq atigi bir ochkoni tashkil etadi. Shu bilan birga, parijliklar hisobida hali bitta zaxira o‘yini mavjud.
