Бразилиянинг «Фламенго» клуби Испаниянинг «Альмерия» жамоаси устидан қарздорлик масаласида судга мурожаат қилишга тайёрланмоқда. Қизиғи шундаки, «Альмерия»нинг 25 фоиз акцияларига афсонавий Криштиану Роналду эгалик қилади.
Ҳаммаси 2024 йилда «Альмерия» футболчи Лазаро Винисиусни сотиб олганидан бошланган (кейинчалик маълум бўлишича, трансфер қарз эвазига амалга оширилган). Лазаро аллақачон Испания клубида ўз фаолиятини якунлаб (у ерда унчалик муваффақият қозона олмади, фақат бир марта хет-трик қайд этган), Бразилиянинг «Палмейрас» жамоасига қайтиб улгурди. Бироқ унинг трансфери учун тўланиши керак бўлган тахминан 2 миллион евро миқдоридаги қарз ҳамон ёпилмаган.
«Фламенго» ҳуқуқшуносларининг таъкидлашича, ушбу қарздорлик бундан роппа-роса йигирма ой аввал — яъни 2024 йилнинг ёзида бартараф этилиши керак эди. Аммо ҳозиргача тўлов амалга оширилмаган.
