«Астон Вилла» вингер Жейдон Санчонинг жароҳати сабабли жиддий муаммога дуч келди. The Athletic нашрининг хабар беришича, «Манчестер Юнайтед»дан ижарага олинган футболчи Испаниянинг «Эльче» клубига қарши ўртоқлик учрашувида сафдан чиққан.
Санчо Гонсало Вильяр билан тўп учун курашдан сўнг ноқулай йиқилган ва танаффусга қадар майдонни тарк этган. Елкасидан жароҳат олган футболчи камида 2-3 ҳафтани ўтказиб юбориши кутилмоқда. Тиббий кўрик натижаларига кўра, суяк чиқиши кузатилмаган, бироқ бўғим билан боғлиқ муаммо аниқланган.
Шу тариқа, Санчо бирмингемликларга Европа Лигаси чорак финали доирасидаги «Болонья»га қарши ўйинларда, шунингдек, Англия чемпионатининг «Ноттингем Форест» билан баҳсида ёрдам бера олмайди.
