«Аталанта» клубининг бразилиялик ярим ҳимоячиси Эдерсон Италия А Сериясини тарк этиб, фаолиятини Испания чемпионатида давом эттириши мумкин. Бу ҳақда инсайдер Фабрицио Романо хабар бермоқда.
Журналистга маълум бўлишича, 26 ёшли ярим ҳимоячининг трансферига Мадриднинг «Атлетико» клуби қизиқиш билдирмоқда. «Матрасчилар» футболчининг трансфери бўйича музокаралар ўтказиб, келаётган ёзда амалга ошириладиган ўтиш бўйича дастлабки келишувга эришишган.
Эдерсоннинг бергамоликлар билан имзолаган меҳнат шартномаси келаси йилнинг ўрталарига қадар амал қилади. Унинг бозор қиймати 40 миллион еврога баҳоланмоқда.
Италия чемпионатининг жорий мавсумида ярим ҳимоячи 23 та учрашувда майдонга тушиб, битта гол муаллифига айланди.
