«Тоттенхэм» бош мураббийи Роберто Де Дзерби, агар «шпорлар» Англия Премьер-лигасини тарк этса ҳам, ўз лавозимида қолишга ваъда берди, деб хабар қилмоқда BBC.

«Мен беш йиллик шартномага имзо чекдим, чунки бу мен учун катта синов. Нима бўлишидан қатъи назар, келаси мавсумда ҳам «Тоттенхэм» мураббийи бўламан. «Тоттенхэм» фаолиятимдаги энг муҳим чорлов бўлиши мумкин ва мен бу масъулиятни бўйнимга олишга тайёрман. Ҳозир клубдаги барча учун оғир дамлар, лекин ўйлайманки, бизда бу қийинчиликларни енгиб ўтиш учун етарлича сифатлар мавжуд», — дея Де Дзербининг сўзларини келтиради BBC.

Де Дзерби шу ҳафтада «Тоттенхэм» билан беш йиллик шартнома имзолади. Энди Робертода «шпорлар»ни АПЛда сақлаб қолиш учун жорий мавсум якунига қадар еттита ўйин бор. Мутахассис ўз футболчиларига ва ўзига ишонади, бироқ руҳан келаси мавсумда Чемпионшипда ишлашга ҳам тайёр.