«Манчестер Юнайтед» ярим ҳимоячиси Бруну Фернандеш АПЛда ойнинг энг яхши футболчиси совринини қўлга киритди.
Португалиялик футболчи март ойидаги 4 та ўйинда 2 та гол урди ва 4 та голли узатмани амалга оширди. Бруну ушбу совринлар сони бўйича Криштиану Роналдуга етиб олди (ҳар иккисида олтитадан).
Энди Фернандешга ҳозирда Харри Кейн, Серхио Агуэро ва Муҳаммад Салоҳга тегишли бўлган рекордга (7 та соврин) етиш учун атиги битта мукофот кифоя қилади. Сўровномада португалиялик футболчи Жеймс Гарнер («Эвертон»), Морган Гиббс-Уайт («Ноттингем Форест»), Энтони Гордон («Ньюкасл»), Алекс Ивоби («Фулхэм»), Давид Райя («Арсенал») ва Дэнни Уэлбекни («Брайтон») ортда қолдирди.
Ойнинг энг яхши мураббийи соврини эса «Арсенал» устози Микель Артетага насиб этди. «Канонирлар» ўтган март ойида ўтказилган учта ўйиннинг барчасида ғалаба қозонишди. Испаниялик мутахассис овоз бериш жараёнида Эдди Хау («Ньюкасл»), Фабиан Хюрцелер («Брайтон»), Режис Ле Бри («Сандерленд») ва Дэвид Мойесни («Эвертон») ортда қолдиришга муваффақ бўлди.
