«Manchester Yunayted» yarim himoyachisi Brunu Fernandesh APLda oyning eng yaxshi futbolchisi sovrinini qo‘lga kiritdi.
Portugaliyalik futbolchi mart oyidagi 4 ta o‘yinda 2 ta gol urdi va 4 ta golli uzatmani amalga oshirdi. Brunu ushbu sovrinlar soni bo‘yicha Krishtianu Ronalduga yetib oldi (har ikkisida oltitadan).
Endi Fernandeshga hozirda Xarri Keyn, Serxio Aguero va Muhammad Salohga tegishli bo‘lgan rekordga (7 ta sovrin) yetish uchun atigi bitta mukofot kifoya qiladi. So‘rovnomada portugaliyalik futbolchi Jeyms Garner («Everton»), Morgan Gibbs-Uayt («Nottingem Forest»), Entoni Gordon («Nyukasl»), Aleks Ivobi («Fulxem»), David Rayya («Arsenal») va Denni Uelbekni («Brayton») ortda qoldirdi.
Oyning eng yaxshi murabbiyi sovrini esa «Arsenal» ustozi Mikel Artetaga nasib etdi. «Kanonirlar» o‘tgan mart oyida o‘tkazilgan uchta o‘yinning barchasida g‘alaba qozonishdi. Ispaniyalik mutaxassis ovoz berish jarayonida Eddi Xau («Nyukasl»), Fabian Xyurseler («Brayton»), Rejis Le Bri («Sanderlend») va Devid Moyesni («Everton») ortda qoldirishga muvaffaq bo‘ldi.
