"Атлетико" бош мураббийи Диего Симеоне Ла Лига доирасида эртага бўлиб ўтадиган "Барселона"га қарши баҳс олдидан ўз фикрларини билдирди.

"Футбол, биринчи навбатда, футболчиларга боғлиқ: мураббийларнинг ғояларидан ташқари, айнан ўйинчилар ўз даражаси ва сифати билан бундай учрашувлар тақдирини ҳал қилишади. Янги мураббий келганидан бери улар жуда яхши ҳаракат қилишмоқда — ҳимоя чизиғини юқорида тутиб, яккакурашларда ғалаба қозонишга интилишяпти. Биз эса 14 йилдан бери ўз хусусиятларимизда келиб чиқиб ўйнаяпмиз ва рақобатбардош бўлиб қолиш учун ишлашда давом этамиз.

Уларнинг барча футболчилари хавфли, чунки улар ажойиб ижрочилар. Улар рақиб майдонида ўйнашни билишади ва сизга ўйлаш учун вақт беришмайди. Улар буни ҳар бир ўйинда қилишади, бу эса жуда қийин — юқори ҳимоя чизиғи билан ўйнаб, таваккал қилишади. Биз ўйинни уларга зарар етказа оладиган йўналишга буришимиз керак бўлади", — деди Симеоне.