«Ливерпуль» ва «Тоттенхэм» клублари «Фулхэм» вингери Гарри Уилсон учун кураш олиб боришади.
Уэльслик футболчи шу йилнинг июль ойидаёқ эркин агентга айланиши мумкин — унинг «дала ҳовли эгалари» билан шартномаси ўз ниҳоясига етмоқда. TEAMtalk нашрининг хабарига кўра, «қизиллар» ва «шпорлар» вазиятни диққат билан кузатиб боришмоқда ва мавсумлар оралиғида 29 ёшли футболчини ўз сафига қўшиб олишга тайёр.
Гарри Уилсон — «Ливерпуль» тарбияланувчиси ҳисобланади, бироқ мерсисайдликларнинг асосий жамоасида бор-йўғи икки бор майдонга тушган. Жорий мавсумда футболчи «Фулхэм» сафида барча турнирларда 34 та ўйинда иштирок этиб, ўз ҳисобига 11 та гол ва 7 та голли узатмани ёздириб қўйди. Машҳур Transfermarkt портали унинг бозор қийматини 25 миллион еврога баҳоламоқда.
